今晚4场世盃外欧洲区附加赛一触即发，其中最受关注嘅，梗系同处C组嘅意大利及葡萄牙，能否齐齐赢波於决赛碰头。因应俄罗斯入侵乌克兰，原本要出战波兰嘅俄罗斯被「DQ」，令波兰自动进身B组决赛，而乌克兰原定对苏格兰嘅A组赛事亦获延期。除欧洲区外，亚洲区及南美洲区世盃外亦连场大战，球迷千祈咪错过！
今晚附加赛C组瞩目大战，葡萄牙主场硬撼土耳其。葡萄牙今次因伤病问题未能「夫添」出击，但喺多位「英超兵」压阵下，攻力依旧强劲，加上近7场世盃外有6场开3球或以上，面对攻强守弱嘅土耳其随时大手交易，2.5球入球大值得一试。
（有线661及601台周五凌晨3时45分直播）
葡萄牙分组赛最後一场阴沟里翻船，以1比2倒输畀塞尔维亚，将直接出线资格拱手相让，只能以次名转战附加赛。佢哋今个国际赛期遇着伤兵及停赛潮，一对正选中坚鲁宾戴亚斯、比比，以及中场连拿度辛捷士均缺阵，不过25人大军中依旧有9位英超球星压阵，包括基斯坦奴朗拿度、般奴费南迪斯及迪亚高祖达等进攻好手，火力唔使怀疑，其中Ｃ朗力争第5次亮相世盃决赛周，斗志必盛，既然防线唔齐脚，倒不如全力抢攻争取晋级。
土耳其踢法有前冇後
土耳其旧年9月改由前德国U23领队根斯执掌，分组赛最後4轮取得3胜1和，得以力压挪威以次名杀入附加赛。球队喺分组赛防守未如理想，10战失咗16粒，包括作客曾以1比6大败畀荷兰。不过佢哋同样胜在火力强劲，分组赛轰入27球，唔赦同葡萄牙斗攻，大盘不容错过。
