南美球員成日手多多，最出名當然有阿根廷球王馬勒當拿嘅手球入波，喺1986年世盃八強以2:1踢英格蘭出局。至於美斯喺2007年代表巴塞隆拿對愛斯賓奴嘅西甲比賽入面都試過複製「上帝之手」，最後巴塞同對手踢成2:2。手仲可以用嚟擋波，喺2010年世盃八強，烏拉圭對加納嘅加時，烏軍前鋒蘇亞雷斯喺門前用手擋出對手必入波。雖然阿蘇紅牌兼輸12碼，但加納12碼宴客，最後兩隊要互射12碼分勝負，烏拉圭射贏入四強。