呢周係國際賽期，歐國外又踢晒，牌面最好睇而又有競爭意味嘅，肯定係南美區嘅世盃外，巴西對烏拉圭、智利對阿根廷兩場都係大波。講起阿根廷，成日都聽話美斯差個世盃冠軍，但阿根廷一日係馬天奴教，睇怕美斯都好難拎冠軍；可以講句，馬天奴係美斯拎世盃嘅最大障礙。
阿根廷陣容豪華，貴為應屆世盃亞軍，三線主力都仲喺高𥧌期，但喺馬天奴執教之下，家陣阿根廷踢完四場世盃外都係得五分，10隊南美隊入面排緊第六。雖然話阿根廷出線有危機就言之尚早，但呢個成績真係唔收貨囉。如果小弟係美斯，其實都幾灰，好似逃唔出馬天奴嘅掌心咁。
自哥迪奧拿離任巴塞隆拿主帥後，巴塞最黑暗嘅時期就係13/14球季，由馬天奴執教嗰陣。嗰季巴塞只係拎到隻西超盃，可以話係四大皆空：歐聯八強出局，國內又唔夠馬德里雙雄鬥。喺馬天奴帶隊下，美斯連入波都少，嗰季入得41球，係佢對上六季入球最少嘅一季。馬天奴喺2014年夏天走人，美斯諗住一天光晒；係就係光晒，但只係巴塞天光，因為馬天奴走咗去教阿根廷。
嚟緊2018年俄羅斯世盃，係美斯喺當打之齡出戰嘅最後一屆世盃，而且迪馬利亞、阿古路呢代人亦喺職業生涯巔𥧌，係阿根廷捧盃嘅好機會；但由馬天奴執教的話，相信都凶多吉少。其實阿根廷都有唔少好教練，至少冇巴西咁慘，「森巴軍團」唔係史高拉利就鄧加，好心阿根廷就搵個勁啲㗎啦！