一年前，如果你同人講李斯特城會同熱刺爭英超冠軍，相信絕大部份人都會笑你儍仔，但現實幾離奇都有，家陣李城同熱刺排緊頭兩位。除咗阿仙奴維持一貫水準，幾支英超豪門都突然間下滑，造就咗今季嘅奇景，或者叫童話。
咩叫童話？故事正面之餘仲有啲超現實。咩係現實？有錢大晒，有錢係贏家。李城同熱刺嘅轉會開支同球員人工都唔高，喺英超嚟講只屬中產，但呢兩支中產竟然可以打低富豪，仲唔係超現實？李城獨具慧眼，將一班平價兵打造成英超榜首之師；熱刺重用青訓，將一班小將打造成人見人怕嘅少壯兵團。佢哋用自己方法彌補財富嘅差距，向大家說明有錢唔係玩晒。對於小弟呢啲冇錢嘅人嚟講，有個故仔證明有錢唔係大晒，呢種梗係正面思想啦。
不過，小弟亦知道童話係短暫同珍貴，李城同熱刺嘅童話很可能會喺殘酷嘅現實中有個悲情結局。李城班主話，如果拎咗冠軍、下季踢歐聯，佢會加大投資買人，令小弟不其然想起列斯聯；當年嗰隊有基維爾嘅列斯就係衰太進取，使完錢買星，但球隊又兼顧唔到雙線作戰，結果唔單止冇機會由中產變富豪，家陣仲做緊貧民。
童話不常有；但要喺童話嘅大團圓結局後，可以拍到套唔爛嘅續集，仲可以好似《真情》咁維持成千集就更加罕有。創業難，守業更難，守住一個童話嘅美好最難。究竟灰姑娘係同王子永遠幸福生活落去，定係嫁咗入門遇着野蠻奶奶搞到離婚收場，真係要睇吓李城同熱刺嘅智慧。