日職周日獨腳戲，近況大勇嘅ＦＣ橫濱，主場迎戰三甲分子大阪櫻花。FC橫濱經歷早前一輪低潮後，近期大爆發取得聯賽3連勝入8球，急升至中游聯賽行列，櫻花近期亦頻頻上演入球騷，兩軍碰頭預期會擦出火花，入球大2.5球值得捧場。

（有線661、601台周日下午5時直播）

對一般球迷嚟講，對ＦＣ橫濱嘅最大印象，除咗係升班球隊之外，就係53歲前日本「國寶」三浦知良仲踢緊，其實佢甚少喺日職亮相，只會喺日聯盃上吓陣，用嚟刷新佢個最年長球員紀錄，FC橫濱主要倚重一班後生仔。

重用新人無可避免要交學費，但係當適應咗日職節奏之後，ＦＣ橫濱愈戰愈勇，連續擊敗湘南比馬、鹿島鹿角及清水心跳，聯賽取得3連勝，幾位攻擊好手皆川佑介、齊藤光毅及松尾佑介都有優異演出，尤其剛滿19歲嘅齊藤光毅，被視為明日之星，一年前就有幾支意乙球隊開始打佢主意。而且ＦＣ橫濱近戰起用傳控能力比較強嘅佐藤謙介、手塚康平坐鎮中後場，組織力明顯提升，今仗返回主場出擊爭取4連勝，又有摩洛哥裔前鋒拿查比完成註冊手續可以披甲，令人期待。

雙方近仗入球率超高
大阪櫻花今季表現平穩，前仗作客榜首勁旅川崎前鋒，以2比5大敗之後，迅速回復原狀，其後立即反彈2比1擊敗仙台維加泰，清武弘嗣、坂元達裕等均有入球進帳，今仗作客ＦＣ橫濱有力添食。由於兩隊近況大勇，觀乎「櫻軍團」聯賽近3戰平均入球達2.33球，ＦＣ橫濱更加係2.67球，對攻隨時合演入球騷，入球大2.5球有計。