熱刺教練摩連奴正忙於進行季前準備，除咗帶隊踢熱身賽備戰，喺轉會市場執貨之外，原來仲去咗學韓文，希望可以增進同南韓前鋒孫興民嘅溝通。

葡萄牙籍教練摩連奴精通6種語言，包括母語葡萄牙文、西班牙文、英文、法文、意大利文以及加泰羅尼亞語，「摩佬」對學習語言十分重視：「語言係對當地文化嘅尊重，加上可以令我進一步了解球隊入面嘅唔同文化。」另外佢認為語言能夠令球員清楚接收自己嘅指令：「當我同球員交流個陣，溝通好緊要，我必須用所有人都理解嘅母語，所以我依家學緊韓文。」

今晚友賽雷丁有得睇
熱刺球星孫興民係上季熱刺嘅次席射手，僅次於哈利卡尼。呢名28歲南韓國腳喺各項賽事射入18球，交出12次助攻，摩連奴因為佢專程去學韓文都無可厚非。

孫興民現時已經操起晒，上周六首場熱身賽鬥葉士域治已經射入2粒，助熱刺3比0贏波，今晚佢哋搵嚟英冠球隊雷丁拍跳，踢佢哋4場季前熱身嘅第2場，相信都會多波入，大家等睇入球騷啦。（Now 621周五晚10時直播）