王牌前鋒受傷
澳職季後賽淘汰圈喺中立場悉尼展開，常規賽3哥威靈頓鳳凰將會同第6位嘅珀斯光輝爭奪4強席位。雖然鳳凰常規賽排名較高，不過復賽後嘅狀態其實幾差，6場賽事只係贏得1場，而且近年對賽都畀珀斯光輝食住，平手盤捧光輝。

（myTV Gold 302、Now 639、有線655及615台周六下午3時直播）

威靈頓鳳凰喺澳職停擺前氣勢如虹，不過同其他球會一樣，停擺期間經歷重大變動，威靈頓鳳凰明顯受到更大打擊，復賽後6仗只得1勝，最終能夠以第3名衝線，實質係食老本，有賴復賽前打穩根基。

近5次交手輸4場
雖然威靈頓鳳凰復賽後唯一勝仗，正正就係贏今場季後賽對手珀斯光輝，但當時為球隊先開紀錄嘅英格蘭王牌前鋒加利賀柏，因為大腿受傷已宣告提早收咧，嚴重削弱鳳凰實力。再者，威靈頓鳳凰嗰場勝仗，係兩隊近5次交手中鳳凰唯一嘅勝仗，其餘4次都由珀斯光輝獲勝，可見珀斯光輝踢法食住鳳凰，今場可以秤先。

珀斯光輝復賽後6場贏2場，成績只係略優於威靈頓鳳凰，不過呢支上屆總決賽球隊經驗豐富，教練普波域近7季有4季帶領執教球隊晉級總決賽，應付呢類一場定勝負嘅淘汰賽，自然更加得心應手，烏拉圭老將前鋒科拿路利亦見慣大場面，相信珀斯光輝可以發揮最佳水平擊敗鳳凰。