日乙周中同樣開快車，1哥長崎成功丸主場迎戰千葉市原。成功丸上場雖然輸波，不過佢哋今季主場出擊表現特別醒神，對住演出飄忽嘅市原，有望藉地利打場翻身仗，主勝捧得過。（周三晚6時開賽）

上季僅列中游嘅成功丸，今季猶如猛虎出柙，頭12輪聯賽取得8勝，迅速殺上榜首，雖然上場作客山形山神輸0比1，不過佢哋頭6場聯賽主場豪取5勝1和，當中5場勝仗全部先開紀錄，有4場早喺上半場已取得領先，主場出擊例踢順風波。

千葉市原遇強即屈
千葉市原上場作客2比1擊敗磐田山葉，聯賽3連勝，不過佢哋開季頭9輪只得3勝1和5負，相比成功丸嘅主場氣勢，市原水準明顯較飄忽。何況市原遇強即屈，今季面對前列分子甲府風林、大宮松鼠都輸波，今次作客新敗、力求反彈嘅成功丸，恐難全身而退，主勝值得捧場。