前幾日我喺專欄一早提過，歐聯冠軍推介下線嘅拜仁慕尼黑，果然喺尋日凌晨8強以雷霆萬鈞之勢，狂數巴塞8比2，呢支德甲班霸唯一嘅瑕疵，係我哋圈內人所講「High line of defence as their」，即係防守線推得太前，切勿孤注一擲，但無論4強對曼城或里昂，最終勝方都比上線嘅巴黎聖日耳門或RB萊比錫，更具冠軍相。

相比之下，歐霸形勢比較難估，4強分別係今晚西維爾對曼聯，同聽晚國米火併薩克達，兩場絕對係「五五波」。曼聯球迷今晚真係祈求蘇斯克查麾下球員生生性性，因為西維爾演出四平八穩，「歐霸之王」絕非浪得虛名；「紅魔」上圈幾經辛苦先淘汰哥本哈根，若然稍一不慎或者輕敵，隨時出局。

薩克達實而不華
另邊廂國米星味雖然更濃，但薩克達踢法非常機動，連場大捷實而不華，預計國米主帥干地唔敢冒進，加上距離決賽只差一步，呢兩場大家都會小心為上，和味濃，不如整條和波過關2串3。