近排睇得最火滾嘅廣告，就係甚麼機場三跑，河蟹校長粉墨登場，本應對佢冇咩期望，亦冇咩感受，最可恥係燒埋已故中國武術家李小龍，同香港首位奧運金牌得主珊珊嗰叠，話佢哋以前喺啟德機場開過記者會同現身，就硬銷當佢哋都支持機場擴建，唔通李小龍報夢畀大家聽，佢都想擴建咩。1,400幾億起多條跑道，打句問句小弟都覺得唔值，呢筆錢又有幾多落咗去既得利益集團，真係校長名曲《你知我知》。對我哋呢啲小市民，面對財政儲備不斷被揮霍，真係只能硬食，以後搭飛機又要畀多一、二百蚊，又貴又唔等使嘅商店就越嚟越多，香港人真係走入一間無窮深淵嘅黑店。
葡超傳統勁旅波圖被視為球壇黑店，因為佢哋近10年嚟已經喺轉會市場執咗六億歐元，而且好多真係水貨；不過比較香港機場，黑店指控真係對波圖唔公道，事關球會一賣一買係你情我願，冇人用支槍指住皇馬主席佩雷斯個頭，要佢收購丹尼路雷斯，亦冇人威脅馬體會唔買積臣馬天尼斯唔得。而且波圖出品都唔一定係水貨，占士洛迪古斯都仲叫唔錯，比比、法卡奧都曾經威過，當然都有路爾斯安達臣、侯克等等啦！
邊間球會唔想好似曼聯、曼城、皇馬咁有米，想買邊個就買邊個，小球會艱苦經營都要靠低買高賣，8、90年代表表者係阿積士，𠵱家就一定係波圖。波圖更優勝之處係連南美、非洲等地都有線眼，睇吓今屆歐霸盃如果又打起，又有幾多富豪球會買波圖嘅巴謙美、阿布巴卡等等。