星期四有場歐霸盃，由波圖對多蒙特，小弟同牽牛兄都醒起，呢兩隊都係歐洲轉會市場入面嘅中轉商，最叻發掘新人，然後再賣畀啲班霸。當然，喺態度上兩隊有少少分別，波圖係滿足於呢套生存模式，透過低買高賣賺錢，而多蒙特係想留住球星，但人工唔高，留唔到人，被迫成為中轉商。
不過，想喺多蒙特買人就要小心，人哋用得好嘅，唔代表你都識用。皇家馬德里同曼聯都試過買多蒙特嘅當家球星，皇馬買紐尼沙軒，而曼聯就買香川真司，結果皇馬同曼聯都用唔好佢兩個，最後多蒙特將佢兩個收返嚟。以香川為例，喺曼聯嗰兩年表現時好時壞，點都夾唔到隊波，返到多蒙特後就魚入大海，家陣又生生猛猛！所以有網民話，假如多蒙特係一間舖頭，佢哋賣嘢永遠都唔畀說明書個客睇，結果啲客盲摸摸，得物但唔識用。
如果戰術啲去睇，可能係呢班球星只能喺多蒙特嗰套踢法中發光發熱，係球隊成就咗佢哋，當一離開「蜜蜂軍團」嘅體系就會失準。講開多蒙特賣星，除咗香川同沙軒，點可以唔提馬里奧葛斯，但佢喺拜仁慕尼黑亦渾渾噩噩，冇以前咁搶鏡；係羅拔利雲度夫斯基叫做轉會後都對辦。唔好意思，醒起羅拔仔唔係賣出去，係送出去先啱。
𠵱家全歐豪門都吼實多蒙特前鋒奧巴美揚同中場根度簡，奧巴美揚喺德甲入咗21球；而根度簡亦由重傷完全恢復過來，表現非常好。不過，經過香川同沙軒呢啲例子後，相信曼聯、利物浦等喺買多蒙特球員之前都會格外小心。