英超真係好睇過戲，單係上周中利物浦捧盃之夜大破車仔5比3，兩閘阿歷山大阿諾特同安德魯羅拔臣，踢到雙翼齊飛，好耐未見過一隊有兩位咁頂尖嘅翼衞。其中喺利市土生土長嘅阿諾特，唔單止出擊力強，處理死球亦有一手，嗰場佢轟入嘅靚罰球，頗有碧咸「七旋斬」影子，喺陣中坐擁多名射得之人下，領隊高普依然敢用呢位後生仔處理自由球，真係要讚佢一句眼光獨到。

今晚揀波戰意行先
講番今晚英超煞科夜，依然係引人入勝，其中李斯特城對曼聯及車路士對狼隊，涉及歐聯同歐霸席位之爭，如果曼聯同「車仔」均打和，就攜手出戰歐聯，若李斯特城贏波嘅話，曼聯就要睇狼隊贏唔贏到「車仔」，刺激到暈。

不過Peter今晚有兩場信心更大嘅推介畀大家，首先係熱刺作客水晶宮，水晶宮冇晒鬥心，聯賽7連敗有辦你睇，熱刺只要球員同主帥摩連奴冇心病，一定搏埋佢，再望狼隊失分闖下屆歐霸，摩帥亦可保住烏紗。另一場係尾2嘅般尼茅夫作客愛華頓，愛華頓等收咧，「般茅」為護級非勝不可，受讓可以秤先。

至於阿仙奴對屈福特，阿仙奴已經將焦點放晒喺嚟緊嘅英足盃決賽，屈福特仲要搶分救亡，季尾波戰意行先，「大黃蜂」受讓抵玩，不過呢場信心冇咁大，祝大家好運。