周中快車，大阪櫻花回師主場迎戰人氣球隊神戶勝利船。兩隊上周末聯賽齊齊告捷，櫻花作客擊敗實力分子廣島三箭，勝利船亦喺主場贏清水心跳，反映兩隊都開始上力，要分出勝負並唔容易，不過翻查兩軍對賽往績，發現每次交手都甚少入波，今次信往績捧中位數2.5球嘅入球細。（有線662及602台周三晚上6時30分直播）

大阪櫻花前仗受挫於名古屋鯨魚後，上周末立刻反彈，作客2比1贏廣島三箭，開季5戰4勝排聯賽第3，僅落後榜首川崎前鋒1分。櫻花主場出擊向來穩打穩紮，近3場聯賽主場全開2球或以下，今場對住星光熠熠嘅勝利船，料會再次以守為攻，未必敢輕率冒進。

對賽旺開入球細
神戶勝利船擁有恩尼斯達、華美倫等名將，每次登場都係球迷焦點，勝利船開季至今，除咗復賽首仗淨吞廣島三箭3蛋之外，其餘各仗表現尚算正常，上周末主場迎戰清水心跳，就喺佔盡優勢下以3比1取勝。兩支新勝之師相遇勝負難料，但對賽往績顯示，兩隊近7次交手法定時間全開2球或以下，捧入球細最穩陣。