薩斯索羅主場愛喪攻
周三凌晨意甲，兩支攻擊力強大嘅球隊碰頭，薩斯索羅主場迎戰AC米蘭。薩斯索羅踢法「大無畏」，入得又失得，主場出擊更往往義無反顧狂攻對手，連續4場主場轟入對手3球或以上；AC米蘭復賽後亦狀態大勇，8場聯賽6勝2和，每場至少入2球，今場兩軍鬥攻必演入球騷，捧3.5球大盤最穩陣。（myTV Gold 301、Now 638、有線654及614台周三凌晨3時45分直播）

薩斯索羅復賽後表現唔錯，除咗首戰輸畀阿特蘭大1比4，之後8場聯賽4勝4和未輸過，當中包括3比3踢和國際米蘭及祖雲達斯，作客2比1擊敗拉素，對住前列球隊毫無懼色，佢哋對上4場主場聯賽加埋入咗13球，每場至少入3球。

薩軍輪換火力不減
值得一提嘅係，為應付緊密賽程，薩軍教練迪薩比作出輪換，但並冇影響攻擊力，卡佩圖、杜文尼高貝拉迪、謝利美保格今季已經有雙位數字入球，連長居後備嘅迪費爾前仗亦梅開二度，一旦全方位攻門，任何一隊嘅後防唔容易抵擋。

AC米蘭自意甲重開後狀態更勇，聯賽8戰6勝2和保持不敗，包括擊敗祖雲達斯、羅馬等前列球隊，大有機會取得來屆歐霸參賽資格。「戰神」伊巴謙莫域加盟後，除咗自己入波，亦帶動整體士氣，佢哋每場都最少入2球，連續4場總入球皆開4球或以上；今場對賽雙方均攻強於守，有望合演入球騷。