葡超傳統「3巨頭」之一嘅士砵亭今晚作客甘馬雷斯，雖然士砵亭1月將主將波基斯費南迪斯賣畀曼聯，但陣中仍不乏猛將。呢支葡超「4哥」近5次鬥甘馬雷斯獲4勝1負，充滿格食格味道，加上仲要力保「前5」席位，士砵亭作客受讓平半，下盤相當抵玩。

（周五凌晨4時15分開賽，馬會網上文字直播）

士砵亭爭標渺茫，但仍要為下屆歐洲賽席位努力。士砵亭停擺前僅領先第6位嘅甘馬雷斯5分，同時亦落後第3位布拉加4分，絕對不能鬆懈，戰意有保證。自中場大將波基斯費南迪斯離隊後，士砵亭靠兩位南美兵雷斯菲利比及馬高斯阿古拿數胡，兩人喺聯賽已經合共攻入10球，其中馬高斯阿古拿首循環主場對甘馬雷斯亦有士哥，協助球隊贏3比1。

甘馬雷斯遇強腳軟
甘馬雷斯今季成績唔錯，暫排第6位，同樣有機會踢歐洲賽。佢哋12場聯賽主場輸咗4場，事實呢4次主場敗仗之中，對手包括前3位球隊波圖、賓菲加及布拉加，可以話遇強即屈，今場即使有主場之利亦難言穩勝之道，仲要讓平半，揀番士砵亭下盤為妙。