NBA巨星高比拜仁日前因坠机意外离世，震撼整个体坛！高比唔单止係一名杰出嘅篮球员，本身亦係足球迷，更係巴塞粉丝，甚至将当年哥迪奥拿执教嘅「地上最强」，同佢所效力、凭藉前场三角进攻横扫NBA嘅洛杉矶湖人互相媲美，认为大家都用具观赏性嘅进攻称王，难怪佢突然过身，美斯、C朗、朗拿甸奴纷纷喺社交媒体作哀悼，尼马入波后更做出「24」（高比波衫号码）嘅手势。

高比嘅天分毋庸置疑，但佢并冇学其他「流星」一样，因天赋而疏懒，或稍有成就即自满自大，反而经常抱着谦虚心态，靠不断努力练习，希望令球技精益求精，加上于比赛中永不言败嘅精神，令人非常佩服，因此一众名宿及球评家对其离世，都哭成泪人。自上年6月开始，香港陷入政治动荡，近期更告武汉肺炎肆虐，但高比嘅故事提醒咗我──世事无常，正因人生苦短，的确要活在当下，珍惜眼前人。我有亲戚日前往洛杉矶嘅斯台普斯中心，拍下洛城人民哀悼高比嘅短片，迟啲会在我FB同大家分享。

今晚英超主队秤先
至于今晚英超，唔计尾场表现飘忽嘅曼联主场对狼队，头7仗英超主队可秤先啲，尤其係利物浦、纽卡素及韦斯咸嘅3支主队，可以击败修咸顿、诺域治及白礼顿嘅机会较大。

金句：一个NBA篮球巨星经常推广世界足球的故事。