新援基哥列舒治生龙活虎
今晚德甲压轴戏拜仁慕尼黑喺主场斗史浩克04，两军歇冬后首轮赛事都赢波，状态信心都处高峰。拜仁强势主场惯抢攻，史浩克增援后锋线火力急升，作客安联球场冇压力唔会缩，黑柴推介中位数3.5球大盘。

（Now 670、FOX+、有线651及611台周日凌晨1时30分直播）

德甲多支球队喺今次歇冬期都增强锋力，令联赛更见可观，上轮9场比赛合共炮製34个入球，场均接近4球，逾半数总入球达3.5球以上，只有两场係2.5球以下，足见大家抖够之后都放开怀抱抢攻。拜仁上轮作客硬净嘅哈化柏林，经过60分钟苦战后，靠汤马士梅拿大爆发，帮助球队喺末段连番入波，大胜4比0回升联赛榜次席绝对喜出望外，弗爆箭头罗拔利云度夫斯基继续有斩获，今晚喺更有把握嘅主场自然信心十足，何况中后场大将甘美治停满复出，球队亦借得皇马左闸奥迪奥苏拿助阵，兵源短缺问题得以缓和，当然会开行Turbo抢攻直追榜首RB莱比锡。

「矿工」王牌夏列特伤愈复出
「矿工」史浩克上轮主场击退强敌慕逊加柏，新援基哥列舒治带嚟惊喜，呢位嚟自奥格斯堡嘅借将，首度披上史浩克战衣即交出一次救空门，一次助攻同一个入波，成为全场最佳球员。有咗呢位高大锋将，配合今季进步神速嘅中场苏奥沙达，仲有伤愈复出嘅王牌夏列特，前线进攻板斧更多，上仗对慕逊加柏，连今季加盟后表现平平嘅箭头宾尼图拉文都激活埋，喺前线走位二传贡献良多，作客安联球场，史浩克拚输嚟打唔会有任何压力，好有机会同拜仁合演精彩入球骚。