虽然周日「双红会」先係强强对碰嘅戏码，但今晚有3场赛事都具睇头，不论係强弱对垒、中游互撼抑或是弱旅护级战，全部都好激烈。

早场热刺作客屈福特，外号「白百合」嘅佢哋，要乘住周中足总盃晋级嘅气势乘胜追击，领队摩连奴要挽回声誉，球队暂得30分排第8，今场不可以再失分，係必胜嘅格局。

较后时间阿仙奴会对住有「大刀球会」之称嘅锡菲联，亦係一场难打嘅波，锡菲联领队韦达被指比利物浦高普更有功架，虽然笔者对呢个评价唔係绝对认同，但韦达上季获得英格兰联赛领队协会大奖，球队确係踢出烧鹅味道。阿仙奴领队阿迪达经过几场比赛后已经渐入佳境，但究竟只係蜜月期抑或真係可以扶摇直上，今场胜负係关键。同时间举行嘅诺域治对般尼茅夫嘅护级大战亦甚具睇头，诺域治防守不济但有主场之利，鹿死谁手真係踢过先知。

周日双红会利物浦秤先
至于周日「双红会」利物浦主场对曼联，首循环「红军」作客奥脱福係球队今季唯一一场联赛失分，我相信今场「红魔鬼」好难有运行喇！如果计英超光辉时期，曼联对利物浦可以用「10比1」嚟形容，「红军」今季当然唔会放过曼联，加上利物浦现时踢紧巅峰足球，球员们都好享受场上踢波嘅感觉，而且今场有主场球迷吶喊助威，除非出现球证枉判、输12码或有球员被赶出场，否则「红军」主场对曼联肯定不胜无归。