红魔残阵攻守都差
周三凌晨英格兰联赛盃4强首回合焦点战，曼联主场同曼城合演曼市打吡。曼市双雄今季遭受各自问题困扰，不过无论係表现稳定性或近况，「蓝月亮」始终更胜一筹，「红魔」呢场缺少防线主将哈利马古尼，更加难同死敌周旋，捧番客胜好过。（周三凌晨4时开赛，马会网上文字直播）

曼联踏入2020年依然一胜难求，继新年首战喺联赛以0比2不敌阿仙奴之后，上仗再喺英足盃以0比0赛和狼队，一班前锋连续两场哑火，魔迷睇波睇到无瘾，就连曼联名宿尹佩斯都睇唔过眼，早前开腔批评球队未能为前线提供足够弹药，影响进攻效率。「红魔」伤兵名单除咗有麦汤米尼之外，早前一度伤愈复出嘅保罗普巴又再整亲，呢位法国中场2018年捧起世盃之后，本应进一步巩固自己世界一流中场嘅身份，可惜一直受伤病缠身长期缺阵，个人发展响起警号之余，亦令魔迷一再失望。呢场就连哈利马古尼呢位防线核心都因伤倦勤，曼联随时攻守两端都失序，战力唔值得高估。

相反衞冕英联盃嘅曼城，继英超2比1击败爱华顿之后，上仗英足盃再以4比1轻取维尔港，其中伤愈复出嘅阿根廷射手阿古路踢足全场之余，个人仲有波入，状态已经返晒嚟，计埋2020年头两场胜仗，「蓝月亮」近8仗7胜1负，走势回勇。既然联赛被利物浦远远抛离衞冕机会渺茫，英联盃更加唔可以轻易放弃，相信领队哥迪奥拿呢场会派出强阵应战，有本钱反客为主，撑客胜。