自今季开咧以来，利物浦所展现出前所未有嘅强势，头20场豪取19胜1和，包括圣诞新年快车3连捷，令曼城、李斯特城等劲敌感到绝望，再次印证我早前一番说话，红军今季笃定夺得英超锦标，而非好大机会、高唱入云等模稜两可嘅说法，只需等到时间一到便会封王。
当然，成功并非一朝一夕，尤其係踏入英超时代，先係被死敌曼联长期垄断，并有大水喉射住嘅车路士、曼城轮流坐庄，利物浦经历7任主帅后，喺2015年先迎嚟真命天子高普掌舵，再逐步组织雄厚班底，更饱历过欧联决赛饮恨、上季联赛功亏一篑等教训，先至成就今日嘅赢波机器。
曼联现疲态不宜高估
因此，其他球队惟有向另一些目标埋手，包括历史悠久嘅英足盃。今晚英足盃有狼队对曼联，曼联啱啱输畀阿仙奴明显有疲态，而且中场保罗普巴不断製造问题，不宜高估。至于热刺改由摩连奴接手后，表现唔见得比前任普捷天奴更好，就算明晚主场对住英冠仔米杜士堡都唔易打，同样中途易帅嘅另一支北伦敦球队阿仙奴，喺新帅阿迪达带领下，球员嘅斗心明显有所提升，周一对列斯联值得继续留意。
