球員時代，施丹早已於06世界盃示範如何像「仙丹」般令法國脫胎換骨，幾乎以一人之力領軍打入當年世盃決賽。今日榮升皇家馬德里教頭，他再次施展「仙丹」威力，領軍首兩仗不單全勝入10球，更帶動主場入座率有明顯升幅！
先講上手賓尼迪斯，其實被炒前九仗七勝一和一負，狂入馬模八球及華歷簡奴10球……很差嗎？冇波入嗎？又不是。可惜先天冇個人魅力，觀眾緣這回事確係冇得勉強，加上主場吞巴塞四蛋，隔一排先炒，當「一個月通知」已算畀面。講到尾，皇馬這類粒粒皆星的豪門，「BBC」點樣入波唔通使你教？只要一個具名氣、威望及有能力令球員落場時肯「給力」的人穩定軍心，球隊就會「自動導航」。
如此一來，曼聯立即炒掉雲高爾搵傑斯坐正，車仔唔使請軒迪克請杜奧巴咪掂？又未必！皇馬此着成功，是本身球員組合已是世界頂級；放在球員級數較次的曼聯，或後防老化嚴重的車仔都行唔通。而這段小陽春也不代表施丹可長治久安，次循環再面對強敵巴塞這類硬仗，以及若真被罰不可在未來兩個轉會窗註冊新球員，那時就是對施丹的最大考驗。