今晚德甲重头戏，班霸拜仁慕尼黑作客对史浩克04，焦点自然喺拜仁新援菲腊比古天奴身上，不过教练尼高高华话佢未有足够比赛状态，今场唔会正选上阵，甚至会唔会派佢后备落场都要临场至决定，球队整体状态仍未到位，遇上摆明主守嘅史浩克预期唔会出现大交易，吼中位数3.5球细盘。
（Now 671、FOX+、有线651及612台周日凌晨零时30分直播）
拜仁喺揭幕战主场失望咁赛和哈化柏林，睇番比赛过程佢哋确实唔抵赢，尤其防守中场唔够硬始终係最大隐患，兵源不足亦係失分主因，嚟到第2仗呢两个问题情况都得到一定改善，首席防中查维马天尼斯伤愈复出，成条中场即时硬淨番，新兵比列锡停赛期满好有机会首度亮相，另外新加盟嘅米高古辛斯亦可以增强后备兵源，不过菲腊比古天奴就因为喺暑期代表巴西踢完美洲国家盃，复操时间较迟，今晚只能先喺后备席睇波。
史浩克新帅擅守不擅攻
主队史浩克今季由新帅大衞华拿领军，联赛首战作客守和慕逊加柏0比0，赛果唔失礼但演出就冇乜值得点评，事实上大衞华拿近年执教英格兰球会哈特斯菲尔德，一直都擅守不擅攻，就算2016至17年领军由英冠升上英超，全季46场联赛仅入56球，入球数字严重偏低，今季嚟到史浩克佢亦讲明先致力搞好防线，起码至今喺德国盃同德甲仲保持不失，今季喺爱华顿借用嘅庄祖坚尼喺右闸位表现称职，但焦点新前锋宾尼图拉文首战表现脚风欠顺，今晚遇上班霸拜仁当然唔会急进。