夏萨特倦勤仲有巴利顶档
周日凌晨西甲次轮大战，皇家马德里将会主场斗华拉度列。皇马首轮火力全开，已经同主帅施丹冰释前嫌嘅「大圣爷」加里夫巴利绝对功不可没，加上两军近年交手经常大开大合，呢场随时又係一场入球大战，中位数3.5球入球大值得留意。
(Now 632周日凌晨1时直播)
皇马新一季虽然引入比利时球星夏萨特同塞尔维亚卢卡祖域两位攻击好手，可惜前者受伤患困扰要倦勤，后者又迟迟未同新队友夹掂，加上马高阿辛斯奥重伤长期缺阵，令「银河舰队」前线兵源捉襟见肘。主帅施丹有见及此，终于认低威搵「大圣爷」加里夫巴利救驾。两人今夏关係一度陷入紧张，但冰释前嫌后，呢位威尔斯球星随即喺首战以出色表现作回报。查实加里夫巴利作为皇马功勳球员，实力毋庸置疑，由佢搭住射手宾施马，「银河舰队」前场火力有望重回昔日巅峰水准。
借用久保不遂有仇报仇
上季惊涛骇浪之下最终成功护级嘅华拉度列，今季当然想踢多几场争气波，早前一度有传球队有望借到新加盟皇家马德里嘅久保建英加强阵容实力，点知佢两父子临尾转軚，结果呢位日本天才新星被外借到新升班嘅马略卡，华拉度列唔忿气，呢场对番皇马随时出多几成力。
首轮报捷嘅华拉度列，上仗大部分时间打多一人嘅优势下，球队都畀对手入到波，后防讲唔上稳阵，可幸射手沙治哥迪奥拿已经开斋，有助增强其信心。况且皇马近8次联赛对华拉度列豪取7胜1和，其中6次开4球或以上，呢场双方随时再演对攻战，中位数3.5球入球大係好路。