武磊抢镜 反击仲煞食
今晚有多场欧霸盃附加赛次回合上演，各路劲旅为入分组赛争崩头，阿King度咗条过关心水同大家分享。早场中国前锋武磊效力嘅爱斯宾奴作客乌克兰球队索尔亚，索尔亚首回合落后1比3，今场焗攻随时后防空虚，益咗擅打反击嘅爱斯宾奴，入波唔会少，一于捧大盘。
（周五凌晨1时开赛）
阔别欧霸12年嘅爱斯宾奴，今季重返欧战赛场有勇锐演出，近5仗欧霸全胜之馀，场场都入到对手3球或以上，真正做到火力全开。
历基亚硬淨「细」顶格流
新季接过7号波衫嘅武磊，继上圈斩获欧霸处子球之后，上仗作客索尔亚再贡献靓绝助攻，明显同拍档法古度费雷拉同马迪亚斯华加斯踢出默契，配合刚加盟嘅阿根廷前锋卡里利，「爱奴」锋力更盛。主场出击嘅索尔亚想晋级一定要入波，但顾得攻嚟后防分分钟有闪失，大盘值得追捧。
另外两场较迟开波嘅大战，先有苏超劲旅格拉斯哥流浪主场斗波兰代表历基亚。计埋首回合0比0闷和「格流」，历基亚今届欧霸踢咗7场仲未失过波，后防坚係硬淨；「格流」喺谢拉特带领下开季唔曳，但上仗联赛小胜圣美伦所见，球队兼顾两条战线略现疲态，加上嚟紧联赛要硬撼「死对头」些路迪，今仗但求稳阵赢波晋级，吼细盘上算。
最后介绍埋英超狼队主场斗拖连奴。狼队今季野心唔细，奈何联赛开局未算理想，踢盃赛更加想发围，加上近4仗欧霸全开4球或以上，包括首回合作客3比2险胜拖连奴，既然攻强守弱，拣番大盘正路。
（周五凌晨2时45分开赛）