拿高斯文领军劲升呢
德甲独脚戏慕逊加柏迎战RB莱比锡，莱比锡升上德甲3季一直食住加柏，两军历来6次交手，莱比锡取得4胜2和不败佳绩，加柏嘅保路西亚公园球场更加係莱比锡嘅福地，佢哋过去3次作客呢个球场都赢波而回，结合今季莱比锡嘅实力同进度，相信今晚可以保持作客恰死加柏嘅传统，黑柴推介1.8倍客胜！
（Now 672、FOX+、有线653及613台周六凌晨2时30分直播）
双方今季都由新帅领军，对于加柏新帅马高路斯嚟讲，球队畀莱比锡恰死嘅往绩根本可以不理，皆因佢本身就係莱比锡剋星，记得上季佢带领奥甲球队萨尔斯堡，喺欧霸盃分组赛遇上同属「红牛系」嘅莱比锡，竟然可以主客两回合双杀对手，今季嚟到慕逊加柏，领军至今成绩算唔曳，问题係睇番阵上表现只能够讲话平稳，始终未遇到劲旅，前线进攻组织仍欠畅顺，今晚初逢强敌会係重大考验。
加柏近9仗主场不胜
值得一提嘅係加柏近两年主场成绩相当有趣，佢哋喺去年4月至今年1月期间，曾保持德甲主场12连胜，但今年1月底后如中魔咒，至今已经9场未赢过，包括今季联赛头炮闷和史浩克0比0。
莱比锡喺瞩目少帅拿高斯文领军后果然有好开始，开季各项赛事全胜表现清风送爽，奥地利右翼沙比萨喺新帅领军后，连盃赛3场赛事交出3个入球同3次助攻，国脚前锋迪姆华拿亦盛讚拿高斯文上任后令全队升呢，自信有力挑战新季各项锦标，佢亦因为欣赏拿高斯文而动笔同球队续约到2023年，今晚作客有信心取得德甲3连胜。莱比锡上季两负萨尔斯堡都唔係拿高斯文教，今晚两大新帅碰头，马高路斯仲有冇得威绝对係一大疑问。