奥迪加特成材担大旗
今晚西甲压轴战上演巴斯克火爆打吡，由毕尔包主场硬撼皇家苏斯达。虽然毕尔包首轮赢过巴塞，但皇苏今季同样硬淨，从神童变「人球」马田奥迪加特终于嚟料，加上近年打吡不落下风，让球客胜值得捧场。
（Now 632周六凌晨4时直播）
两军同样开季取得1胜1和，不过毕尔包阵中较年轻嘅蒙尼恩、伊拿基威廉斯始终未够火候，关键时刻都係老将信得过，例如首轮爆冷以1比0击败巴塞隆拿，正正係靠后备入替嘅老将阿度里斯一箭定江山，上仗打和基达菲1比1，建功者係另一老将鲁尔加西亚，正所谓最锋利嘅刀亦都有生锈嘅一日，尤其係呢类打甩髀嘅打吡战，真係体力差啲都捱唔到尾。
西维尔当旺上盘要追
相反，皇苏一众年轻球员已可担大旗，除咗自家青训产品奥耶沙巴尔同曼联弃将赞奴沙外，马田奥迪加特亦获得重生，呢位4年前以16岁之龄加盟皇马嘅挪威神童，近年惨变「人球」不断被外借，上季喺荷甲嘅维迪斯交出入波及助攻「双双」数据，点知「银河舰队」依然睇唔上眼，今季再被借去皇苏，好彩佢都争气，上仗作客马略卡更攻入致胜士哥，表现sharp醒。翻查纪录，双方近4次联赛碰头，皇苏取得3胜1和未输过，明显格食格，仲有得受让咁笋，让球客胜捧得过。
至于早少少开波嘅另一场西甲，「1哥」西维尔主场迎战切尔达。西维尔开咧两连胜，兼且全部冇失波，表现四平八稳，切尔达头2仗取得1胜1负，但上仗对华伦西亚有中场丹尼斯苏亚雷斯射失12码，赢波只因对手踢得差，不能尽信，宁买当头起，西维尔让1球照要上盘。