鲸鱼沉沦焗住死守
今晚日联盃8强首回合，川崎前锋主场斗名古屋鲸鱼。鲸鱼近况极沉，不过前锋主场出击亦相当慢热，面对死守球队，总係老鼠拉龟冇碇埋手，连续4场半场皆与对手不分胜负，半场和值得捧场。
（有线604及603台周三晚6时直播）
季初表现不俗嘅鲸鱼，愈踢愈沉，上场联赛以1比2输畀FC东京，2连败共失7粒，防线错漏百出，睇番佢哋自6月中日联盃附加赛次回合击败仙台维加泰后，近12场比赛赢得1场咁大把，状态坚沉。由于今仗作客，相信鲸鱼唔会贸然抢攻，况且佢哋嘅正选门将兰格历克获澳洲国家队徵召，要由土炮武田洋平把关，另外中场米本拓司亦因养避战，兵源不足下做好防守乃重中之重，避免太多失波，令次回合难以翻身。
前锋近7仗未赢过
另一边厢，川崎前锋以种子队身份直入8强，因此今场係佢哋首次喺日联盃亮相。但话虽如此，前锋近况同样欠佳，连同上场联赛1比2不敌大坂樱花后，近7仗未赢过，而且佢哋连主场威力都冇乜，近4场主场出击只得1胜3和，当中有2场全场食白果，3次半场开0比0、1次开1比1，一来球员入局坚慢，二来对亲摆铁桶阵嘅客军，初段总係冇乜破关板斧，更攞命嘅係奈良龙树、大岛僚太仍未好番，中后场实力受削，正宗「攻不锐守不稳」；加上鲸鱼近3场日联盃作客亦全开半场和，不妨追多铺。