歐聯附加賽次回合，塞爾維亞勁旅貝爾格萊德紅星迎戰瑞士年青人。年青人首回合未能藉主場之利贏波，晉級前景可謂凍過水，事關佢哋近10場歐聯作客輸9場，面對上屆主場贏過利物浦嘅紅星睇怕凶多吉少，主勝值捧。（myTV Gold 303、Now 643、有線616及656台周三凌晨3時直播）
年青人首回合主場出擊本應有個好開始，開波7分鐘就憑科特迪瓦前鋒艾沙利入波領先，不過佢哋後防表現水準之下，最終喺一度落後1比2嘅劣勢下，僅憑後備上陣嘅賀拉奧射入12碼逼和對手2比2。由於失掉兩個作客入球，年青人今場必需贏波、或者打和3比3或以上，先可進身32強分組賽，形勢上定必要焗攻，睇番年青人近10場歐聯作客輸9場，加埋一共失咗29球，後防唔多穩陣，壓得太上隨時畀對手搵到更多空位。
紅星上屆贏過利物浦
上季塞爾維亞聯賽冠軍紅星今季保持強勢，開季4場聯賽全勝，而且3場歐聯外圍賽主場亦取得2勝1和，主場威力不容小覷，德國國腳馬高馬連近2場歐聯皆交出助攻，表現寶刀未老，配合今屆歐聯外已有3球進帳嘅加納前鋒保亞基，鋒力有保證。紅星上屆分組賽曾經擊敗最終王者利物浦，面對意甲勁旅拿玻里亦保持不敗，對住實力差一皮嘅年青人未驚過，主W可放心捧場。
