主場威力震懾東瀛兵
亞冠盃8強首回合周二晚上爆發！頭場先上演中日大戰，中超勁旅上海SP主場迎戰亞冠常客浦和紅鑽。上海SP有「奧地利伊巴」阿拿奧杜域今夏加盟，如虎添翼，挾近年亞冠盃主場常勝日職球隊強勢，有力藉地利搶先機，1.56倍主勝熱得有道理。

（Now672、有線613及653台周二晚7時30分直播）

奧地利伊巴射術對辦
上海SP雖有箭頭艾傑臣（艾克森）今夏重返FC廣州，但及時簽入韋斯咸射手阿拿奧杜域，呢名綽號「奧地利伊巴」嘅前鋒，頭5場聯賽披甲便入4球，極速融入球隊，配合森巴孖寶侯克及奧斯卡杜斯山度士，攻力毋庸置疑。上海SP於聯賽僅列第3，更喺上周中於中國足總盃出局，連同周末聯賽0比2不敵FC山東，被視為戰略性放棄，可令他們更專注爭逐亞冠盃，主帥佩雷拉亦破釜沉舟，揚言不奪亞冠盃便辭職，盡顯決心。

浦和紅鑽表現飄忽
前屆亞冠盃盟主紅鑽，於16強兩回合計反勝蔚山現代4比2，幸運成分居多，前線仍過於倚賴老將與梠慎三數胡，容易被盯死。球隊今季於日職僅列中游，各項賽事近8場僅獲2勝，表現飄忽不定。翻查紀錄，上海SP近7次於亞冠盃主場迎戰日職球隊，取得5勝2和不敗佳績，可見主場威力足以震懾東瀛兵，今場有望取得領先優勢，主勝不容錯過。