夏薩特倦勤仲有巴利頂檔
周日凌晨西甲次輪大戰，皇家馬德里將會主場鬥華拉度列。皇馬首輪火力全開，已經同主帥施丹冰釋前嫌嘅「大聖爺」加里夫巴利絕對功不可沒，加上兩軍近年交手經常大開大合，呢場隨時又係一場入球大戰，中位數3.5球入球大值得留意。

(Now 632周日凌晨1時直播)

皇馬新一季雖然引入比利時球星夏薩特同塞爾維亞盧卡祖域兩位攻擊好手，可惜前者受傷患困擾要倦勤，後者又遲遲未同新隊友夾掂，加上馬高阿辛斯奧重傷長期缺陣，令「銀河艦隊」前線兵源捉襟見肘。主帥施丹有見及此，終於認低威搵「大聖爺」加里夫巴利救駕。兩人今夏關係一度陷入緊張，但冰釋前嫌後，呢位威爾斯球星隨即喺首戰以出色表現作回報。查實加里夫巴利作為皇馬功勳球員，實力毋庸置疑，由佢搭住射手賓施馬，「銀河艦隊」前場火力有望重回昔日巔峰水準。

借用久保不遂有仇報仇
上季驚濤駭浪之下最終成功護級嘅華拉度列，今季當然想踢多幾場爭氣波，早前一度有傳球隊有望借到新加盟皇家馬德里嘅久保建英加強陣容實力，點知佢兩父子臨尾轉軚，結果呢位日本天才新星被外借到新升班嘅馬略卡，華拉度列唔忿氣，呢場對番皇馬隨時出多幾成力。

首輪報捷嘅華拉度列，上仗大部分時間打多一人嘅優勢下，球隊都畀對手入到波，後防講唔上穩陣，可幸射手沙治哥迪奧拿已經開齋，有助增強其信心。況且皇馬近8次聯賽對華拉度列豪取7勝1和，其中6次開4球或以上，呢場雙方隨時再演對攻戰，中位數3.5球入球大係好路。