今晚德甲重頭戲，班霸拜仁慕尼黑作客對史浩克04，焦點自然喺拜仁新援菲臘比古天奴身上，不過教練尼高高華話佢未有足夠比賽狀態，今場唔會正選上陣，甚至會唔會派佢後備落場都要臨場至決定，球隊整體狀態仍未到位，遇上擺明主守嘅史浩克預期唔會出現大交易，吼中位數3.5球細盤。

（Now 671、FOX+、有線651及612台周日凌晨零時30分直播）

拜仁喺揭幕戰主場失望咁賽和哈化柏林，睇番比賽過程佢哋確實唔抵贏，尤其防守中場唔夠硬始終係最大隱患，兵源不足亦係失分主因，嚟到第2仗呢兩個問題情況都得到一定改善，首席防中查維馬天尼斯傷愈復出，成條中場即時硬淨番，新兵比列錫停賽期滿好有機會首度亮相，另外新加盟嘅米高古辛斯亦可以增強後備兵源，不過菲臘比古天奴就因為喺暑期代表巴西踢完美洲國家盃，復操時間較遲，今晚只能先喺後備席睇波。

史浩克新帥擅守不擅攻
主隊史浩克今季由新帥大衞華拿領軍，聯賽首戰作客守和慕遜加柏0比0，賽果唔失禮但演出就冇乜值得點評，事實上大衞華拿近年執教英格蘭球會哈特斯菲爾德，一直都擅守不擅攻，就算2016至17年領軍由英冠升上英超，全季46場聯賽僅入56球，入球數字嚴重偏低，今季嚟到史浩克佢亦講明先致力搞好防線，起碼至今喺德國盃同德甲仲保持不失，今季喺愛華頓借用嘅莊祖堅尼喺右閘位表現稱職，但焦點新前鋒賓尼圖拉文首戰表現腳風欠順，今晚遇上班霸拜仁當然唔會急進。