新兵要適應防線唔穩陣
新一季意甲今晚正式開鑼，打頭陣由力爭9連霸嘅祖雲達斯作客鬥帕爾馬。祖記今季繼續大事擴軍，不過新球員太多恐需時適應，而且新主帥沙利因患肺炎，今場無法親自督師，臨場有乜依郁都唔係話贏梗。睇番祖記對上6季聯賽首戰只有1次試過淨勝2球或以上，今場祖記讓球半、兩球有風險，改捧2.5球入球大更穩陣。
（myTV Gold 301、Now 638、有線603、604、614及654台周日凌晨零時直播）
祖雲達斯已連奪8屆意甲冠軍，不過一直夢寐以求嘅歐聯錦標仍未到手，故此今季繼續擴軍，除免費簽入艾朗藍斯、拉比奧特及老將保方，另以7,500萬歐元由阿積士羅致荷蘭中堅馬菲斯迪歷特，並由車路士回收前鋒希古恩及引入巴西守將丹尼路雷斯，即使放走咗葡萄牙右閘祖奧簡斯路、摩斯堅恩及馬田卡沙利斯，整體實力有增無減。
新帥沙利肺炎缺陣
由於球員個別位置上有唔少變動，加上教練一職亦由阿里基換上回歸意甲嘅沙利，踢法上無可避免要重新適應，祖記喺季前熱身賽表現麻麻，對住熱刺、國際米蘭及馬德里體育會，法定時間之內只獲1和2負失6球，似乎仲未搵到最佳陣容，尤其後防表現唔算穩陣。事實上，強如基斯坦奴朗拿度（C朗）上季登陸意甲，季初發揮亦唔算太理想，祖記上季頭4輪聯賽3場有失波、僅以1球差距擊敗對手，而且再睇遠啲，祖記對上6季聯賽首戰雖然贏咗5次，不過只有1次能夠淨勝2球或以上，教練沙利因患肺炎今場唔會領軍，作客讓球半、兩球略為冒險。
帕爾馬有還擊之力
帕爾馬上季重返意甲以第14名過終點，護級成功目標達到，今季球隊仍以謝雲奴、古卡及般奴艾維斯為三線重心，人腳變動不大，上季聯賽兩循環交鋒，帕爾馬取得1和1負，喺祖記身上攞到4個入波，贏唔到都搞亂檔，絕非冇還擊之力，今場轉捧2.5球嘅入球大仲穩陣。
