埃及文明開晒齋
英超連續3周都有Big 6大戰，今晚尾場利物浦主場激鬥阿仙奴。兩隊係開季至今僅餘嘅全勝球隊，利物浦季初保持火力，「埃及文明」上晒力全部開晒齋，面對阿仙奴嘅「性感」防線，相信可保持多波入嘅傳統，中位數3/3.5嘅大盤值得捧場！

（Now 621及611周日凌晨零時30分直播）

利物浦近年對親阿仙奴都踢得燦爛，尤其喺晏菲路球場更甚，近6次碰頭總入球全部都喺4球以上，上季就憑羅拔圖法明奴「戴帽」大勝5比1，所以今場主Ｗ熱到得1.39倍，唔係話冇原因。

利物浦今季不變應萬變，上季僅以1分之差失落聯賽錦標，今季捲土重來，最大隱憂本來係「埃及文明」呢兩年征戰太頻繁，但領隊高普季初都用得好小心，畀佢哋延遲歸隊同輪流休息，所以季初踢來都保持到上季嘅水準。不過「紅軍」防線季初似乎唔係太集中，兩場盃賽同兩場聯賽都有失波，上仗代替艾利臣比加把關嘅阿祖安卡斯迪路出醜，證明佢腳下功夫唔適合參與控球組織，若然阿仙奴三箭齊發，利物浦未必保到不失。

「炸彈」大衞雷斯隨時引爆
事實上阿仙奴今季陣容確實令球迷充滿幻想，皇馬借將丹尼施巴路斯公認係上佳引援，由里爾加盟嘅箭頭尼高拉斯比比雖然未獲正選，但後備落場都有睇頭，加埋雷斯尼爾遜、祖爾韋洛克等優質小將，成隊波活力增強不少。唔講唔知，「兵工廠」已10年未試過開季兩連勝，今季開局咁靚有助增強球員信心。可惜佢哋防線同樣不穩，尤其新加盟嘅大衞雷斯，你永遠唔知呢件「炸彈」幾時發波瘟，佢同柏柏斯達夫普路斯能否阻止「紅軍3條煙」，樂比絕對有保留，與其玩盤倒不如改向大盤埋手仲實際。