周五德甲獨腳戲，回升德甲嘅科隆主場迎戰多蒙特，科隆開季後表現令人失望，難抗超班兼着火嘅多蒙特，多蒙特讓一球，黑柴撐上盤。
（Now 670、FOX+、有線651及611台周六凌晨2時30分直播）
科隆經歷一次降班之旅元氣大傷，陣中星級球員包括隊長祖拿斯赫達同門將漢恩，無論狀態同戰鬥力都有所下滑，今季回升德甲，喺德國盃面對今季至升上德乙嘅韋恩竟然要踢到互射12碼至贏，120分鐘內仲失咗3球波，睇番韋恩至今喺德乙3戰皆北排包尾，就知科隆幾唔掂，跟住德甲開鑼首戰，作客遇上實力同狀態都一般嘅禾夫斯堡，亦大部分時間處於劣勢下完敗，現時所見仲未上力。
「蜜蜂」攻擊群撻着晒
多蒙特開季繼續無堅不摧，德超盃、德盃同德甲都順利輕取對手，上輪德甲大炒奧格斯堡5比1更見銳不可當，前線攻擊群查頓辛祖、馬高列奧斯、杜根夏薩特同祖利安白蘭特組織流暢上力速，為大勇箭頭柏高艾卡沙提供大量有效供應，「蜜蜂兵團」目前質素同狀態都冠絕德甲，現階段作客科隆有力輕鬆取勝。
