鳥棲勝利船護級唔會冒進
今晚日職上演獨腳戲，鳥棲砂岩主場迎戰神戶勝利船，呢場波亦係西班牙「王子」費蘭度托利斯嘅職業生涯告別戰，不過對賽雙方為咗護級，都肯定唔會想失分，加上兩軍近期交手戰況不嬲膠着，寧願轉捧2.5球嘅入球細好過。

（有線602及662台周五晚上6時30分直播）

費托職業生涯曾贏盡世盃、歐國盃及歐聯等各大國家隊同球會級別大獎，成就非凡，可惜現年35歲嘅「王子」近年狀態下滑已成不爭事實，就算喺水平較低嘅日職，發揮都難以令人信服，連帶鳥棲砂岩亦深陷降班區，為護級已經冇失分餘地，加上隊中既缺乏高產射手，即使費托希望以入球紀念呢個特別時刻，惟球隊進攻板斧亦欠奉，今仗惟有焗住以守代攻。

「狂牛雙星」落場贈興
作為昔日國家隊戰友嘅Last Show，效力勝利船嘅恩尼斯達當然會捧場，而且另一「狂牛」韋拿亦告傷愈，可以上陣同老友踐別。不過，相熟還相熟，「小白」就話明唔會放水︰「今場對佢嚟講係場重要嘅比賽，足球從來都唔知道會發生啲乜。我認為喺托利斯嘅告別戰同佢做對手，仲要喺日本舉行，係件不可思議嘅事。我希望同托利斯有一場偉大嘅比賽，不過贏波嘅始終係神戶囉！」

話雖如此，查實勝利船嘅狀況亦唔多好，現時排第15，只比砂岩多2分，為擺脫降級危機，呢仗肯定希望能有分落袋。值得慶幸嘅係後防強援華美倫、酒井高德加盟後，已逐漸適應日職，近兩仗正選上陣勝利船都保持不敗，防線實力有明顯提升。況且兩軍近6次交手，5次開2球或以下，呢場好大機會緊張但唔精彩，中位數2.5球嘅入球細值得留意。