葡兵撐腰火力猛
周五凌晨有多場歐霸附加賽首回合激戰上演，其中拖連奴將會主場強戰狼隊。上季重返英超隨即勇奪歐霸資格嘅狼隊，靠陣中多位高質外籍兵打天下，戰力強勁，面對火力同樣唔曳嘅意甲勁旅拖連奴，兩軍勢演對攻戰，入球大咪錯過。

（周五凌晨3時開賽）

由葡萄牙領隊紐奴掛帥嘅狼隊，繼前季以英冠盟主身份重返頂級聯賽之後，上季更進一步喺群雄割據嘅英超殺出一條血路，以聯賽第7名搶得歐霸入場券，強勢沒法擋！狼隊出晒名靠外籍兵撐起一片天，尤其以葡國兵當道，除歐國盃奪冠功臣摩天奴同門將魯爾柏迪斯奧之外，中場魯賓尼維斯同前鋒迪亞高祖達兩位新星都係狼隊主力，葡國影響力相當明顯。

拖連奴箭頭腳風順
賽前亦有一段小插曲，原來今場執法嘅球證團隊全部來自葡萄牙，計落狼隊隨時有着數，唔怪得拖連奴球迷賽前大呼賽會安排不公，仲將矛頭指向同狼隊關係密切嘅超級經理人佐治文迪斯，話佢同賽會喺背後互相勾結搞搞震，究竟球證有冇偏袒？真係要睇過先知。

無論如何，首次殺入轉制後嘅歐霸嘅狼隊今屆4仗贏晒，至今已經轟入14球，其中3次更開出總入球4球或以上，可以話係來勢洶洶。不過，「公牛」拖連奴整體實力絕對唔輸蝕，陣中有比洛迪同施蒙尼沙薩兩大神鋒肩負進攻重責，後者今屆4場歐霸個人斬獲3球，腳風奇順，今場有力帶領拖連奴同狼隊鬥攻，一於捧入球大。

武磊助陣撐愛斯賓奴
同時間開波仲有愛斯賓奴主場鬥烏克蘭球隊索爾亞，愛斯賓奴今屆歐霸一路高歌猛進，近4仗歐霸全勝，而且每場都贏對手2球或以上，包括第3圈次回合3比0大挫盧塞恩，中國前鋒武磊仲喺該仗射入首個歐霸入波，表現認真爭氣，由佢搭住新加盟嘅阿根廷中場馬迪亞斯華加斯，愛斯賓奴挾主場地利有望再下一城，讓球主勝值博。