阿King睇中幾場聽朝嘅南美波，其中重心為自由盃8強首回合利加大學主場對小保加。利加大學多名中後場主力傷停，實力打折扣；小保加獲羅馬老將迪羅斯加盟如虎添翼，有力反客為主，讓球客勝有計。

（周四早上6時15分開賽）

利加大學陣容不整，上圈次回合對奧林比亞會有入波嘅中場祖真祖里奧，因為同後衞艾迪臣列爾比尾段齊齊領紅，今場要坐波監，連同另一守將卡些度未好番，中後場天殘地缺。反觀小保加近5仗自由盃豪取4勝1和，雖有前鋒賓尼迪圖已轉投馬賽，但代替佢嘅阿比拿於上圈都有士哥；早排以自由身加盟嘅羅馬老將迪羅斯，喺阿盃首度登場已有斬獲，咪忘記仲有另一老將泰維斯隨時候命，受讓可謂抵玩到極。

帕拉尼恩斯法林明高齊捧大
另一場自由盃8強首回合嘅「巴甲內訌」，由法林明高主場迎戰國際體育會。法林明高聯賽主場7戰全勝，上圈次回合對艾美歷克，靠近日傷愈嘅前鋒加比爾巴保沙連省兩粒追和，並藉互射12碼勝出晉級，狀態極佳，不過國體會以荷西古里路、拿費爾蘇比斯及尼高拉斯盧比斯組成嘅3叉戟，今屆自由盃合共轟10粒，捧入球大更佳。

（周四早上8時30分開賽）

最後巴甲獨腳戲帕拉尼恩斯主場鬥聖保羅，聖保羅聯賽4連勝弗到漏，但帕拉尼恩斯今季6場主場聯賽5勝亦非善男信女，同樣要大盤。

（周四早上6時15分開賽）