今晚英冠開快車，阿King同大家度咗條過關。米杜士堡主場鬥韋根，兩軍都幾頹吓，不但喺英聯盃出局，而且開季戰績欠佳，今場為搶分必定先做好防守，加上近年碰頭甚少交收，入球細係過關穩膽。

（周三凌晨2時45分開賽）

米杜士堡今季改由舊將活基治掌舵，羅比堅尼擔任助教，管理層絕對係星味十足，可惜佢哋教波經驗差咁啲，開季頭3場聯賽只得1和2負，仲喺上周中英聯盃互射12碼不敵克魯，士氣低沉。米堡防線不穩乃致命傷，場場有失波，後衞出身嘅活基治深明要止跌回穩，需要先鞏固防守。

另邊廂，韋根雖於開鑼日以3比2擊敗上季英超分子卡迪夫城，但可惜無以為繼，先後喺聯賽同盃賽錄得3連敗。翻查紀錄，兩軍近5次交手，合共僅製造5個士哥，全開2球或以下，加上近況欠佳，相信今場會踢得更保守，細盤捧得過。

打比郡主場惡捧Ｗ
另外揀場打比郡對布里斯托城，打比郡上季攞到升班附加賽資格，新季球隊實力冇大變，而且上季亦係主場輸波最少嘅球隊，面對布里斯托城，主Ｗ要埋。最後睇埋場南美自由盃8強首回合，甘美奧面對彭美拉斯嘅巴西內訌，彭美拉斯食住甘美奧，近5次對賽獲4勝1和，今場受讓必捧讓球客勝。