雖然今晚最矚目賽事係英超狼隊主場砌曼聯，但阿King對呢場冇乜興趣，反而最有心水係挪超獨腳戲，薩普斯堡主場迎戰波杜基林特。波杜基林特依家做緊「1哥」，氣勢如虹，今仗對住近7場聯賽未贏過嘅薩普斯堡，有力締造5連勝，仲有得受讓咁筍，必捧讓球客勝。（周二凌晨1時開賽、馬會網上文字直播）

波杜基林特今季異軍突起，乘住班霸洛辛堡出閘脫腳，唔聲唔聲殺上榜首，其中客場表現突出，今季8場聯賽作客，取得5勝1和2負，係挪超客場成績最好球隊。最重要係，波軍近8仗聯賽贏咗7場，單計近4仗更係贏晒，弗到漏油。相反，徘徊下游嘅薩普斯堡，近7仗聯賽只得4和3負未贏過，上次聯賽贏波已經係6月中嘅事，個勢咁頹，邊有本錢讓波呀？波杜基林特有得受讓真係筍到爆，寧買當頭起，讓球客勝咪錯過。

莫斯科打吡撐斯巴達
同時間開波嘅俄超有莫斯科打吡，莫斯科斯巴達主場迎戰莫斯科中央陸軍。連盃賽在內，斯巴達連贏3場，中場施廉漢巴卡耶夫好弗，近3仗入4粒外，新兵舒賀爾尼亦連續2仗有士哥，火力全開；事實雙方近4次交手，斯巴達只曾1敗，今仗主場受讓必捧讓球主勝。

最後係法乙歐塞爾主場對甘岡，甘岡開季2場作客輸晒，狀態堅曳，不過歐塞爾係穩陣派，連續3場半場打和0比0，預計今仗都係想穩中求勝，半場和值得再追。