西甲開咧首戰就爆出冷門，衞冕嘅巴塞隆拿臨完場前畀畢爾包絕殺，以0比1輸波。同樣作為爭標强隊嘅馬德里體育會當然會吸取教訓，佢哋周一凌晨壓軸登場，同上季神奇球隊基達菲合演「馬德里打吡」，踢法不嬲保守嘅「床單軍團」肯定唔敢輕敵，中位數2.5球入球細值博。（Now 632周一凌晨4時直播）

兩大防守新兵質素不俗
馬體會今夏轉會窗有高甸同菲臘路爾斯等多名主力離隊，其中最矚目肯定非轉投聯賽競爭對手巴塞隆拿嘅頭號前鋒基沙文莫屬。呢位法國射手過去多年都係馬體會進攻嘅關鍵人物，今季冇咗佢衝鋒陷陣，前場火力必定有所削弱。好彩新加盟嘅防中馬高斯洛蘭迪同中堅馬里奧靴莫素質素不俗，前者能有效為防線築起屏障，後者仲有望成長為日後統領馬體會後防嘅領軍人物，加上施蒙尼崇尚的鐵血防守早已根深蒂固，等閒之輩要攻破馬體會大門絕非易事。

基達菲上季聯賽只失過35球，係失球數第3少嘅球隊，後防表現甚至仲叻過巴塞，最終能勇奪歐霸資格，同球隊穩健防守有好大關係。不過基達菲主力箭頭佐治摩連拿已經37歲，新賽季再由佢擔大旗，球隊入球能力難有保證。加上馬體會近5季聯賽首戰4皆開2球或以下，開局取態不嬲審慎，呢場中位數2.5球入球細值得再追。