今晚英超頭場，錫菲聯主場迎戰水晶宮。事隔12年後重返英超嘅「刀片」錫菲聯，首仗唔輸盡顯頑強鬥志，而且佢哋主場出擊堅搶韁，面對仲未上力嘅水晶宮隨時先入波，一於捧錫軍「第一隊入球」。

（Now 621周日晚9時直播）

1992-93年度係英超成立首季，當時錫菲聯唔單止係其中一隊，更喺1992年8月15日主場擊敗曼聯之役，佢哋個箭頭白賴仁甸尼取得英超史上首個士哥，不過佢哋兩季後就降班，就算2006-07年重返英超，亦只得1季貨仔。12年後錫菲聯重返英超，睇嚟做足準備，首輪造訪般尼茅夫，靠老牌前鋒比利沙柏於末段入波逼和1比1，呢類升班球隊都係打道氣，趁對手未摸清佢哋嘅底，必須喺季初拚盡搶分，戰意唔使懷疑。

水晶宮季初例慢熱
水晶宮有王牌韋費特沙夏轉會唔成，首輪對愛華頓只係後備上陣，依然係陣中最具威脅球員，但打多1個依然只能悶和0比0，亦反映出呢支倫敦球隊太倚賴沙夏數胡，只要佢畀人盯死，進攻即刻死晒火，連同季前熱身賽在內，近8仗贏得1場咁大把，加上近幾季季初例牌慢熱，明顯未弗信唔過。翻查紀錄，錫菲聯上季23次主場出擊，有20次先入波堅搶韁，撞正冇態嘅水晶宮，博佢哋「第一隊入球」好過。