進攻form仲未執掂
周日晚有兩場英超上演，尾場車路士主場鬥狐狸李斯特城。比起首輪聯賽淨吞曼聯4蛋，車仔喺歐超盃嘅演出明顯有改善，不過佢哋暫時仲未搵到失去夏薩特後嘅進攻方程式，入波數字料偏低；狐狸今季陣容有一定變動，作客預計亦唔會過分急攻；兩軍近4次交手夾埋只係入得3球，總入球全開2球或以下，捧中位數2.5球嘅細盤最好路。

（Now 621周日晚11時30分直播）

車仔上周末作客曼聯大敗0比4，成為Big6唯一首輪輸波球隊，亦係球隊英超史上開鑼戰最大比數敗仗，不過車路士表現並非一無是處，如非譚美阿巴謙及艾馬臣柏美尼上半場先後射中柱，戰況及比數未必如此一面倒，而且中場靈魂尼高路簡迪對曼聯只係做後備，冇咗佢做防線第一道屏障，經驗比較幼嫩兼新拍擋安達斯基斯坦臣及葛特蘇馬，發揮自然事倍功半；尼高路簡迪喺上周中對利物浦嘅歐超盃復任正選，車仔中場連繫即告脫胎換骨，就算最終喺互射12碼落敗，整體表現亦有明顯改善。

車仔現時最大問題係進攻冇Form，基斯甸普列錫喺踢法上同位置上係取代夏薩特嘅最佳人選，不過呢名美國國腳暫時發揮只算一般，好難靠佢孭飛，譚美阿巴謙活力夠但埋門欠火喉，基奧特就啱啱相反，現階段唔好對車仔攻力有太大期望。

李斯特城人腳變動大
狐狸上場主場對狼隊踢成0比0，新加盟嘅前鋒艾約斯佩雷斯與占美華迪合作效果一般，默契有待改進。防守方面，中堅哈利馬古尼轉投曼聯，韋斯摩根亦年紀漸長，領隊羅渣士改用莊尼伊雲斯夥拍小將蘇恩古，穩定性略嫌不足，預計作客亦會先謀定而後動，既然兩軍近4次碰頭都係少波入，今場中位數2.5球值得再追。