周六晚上西甲首輪大戰，切爾達將會主場迎戰皇家馬德里。「銀河艦隊」新一季雖然引入夏薩特等大牌球星提升攻擊力，不過後防散亂無章嘅問題，喺季前熱身賽中表露無遺，今仗面對嗜攻嘅切爾達隨時合演入球騷，中位數3.5球入球大值博。
（Now 632周六晚11時直播）
上季西甲、西盃同歐聯三大皆空嘅「銀河艦隊」，新一季喺功勛主帥施丹帶領下再次啓航，必希望喺聯賽首戰取得好開局。為此皇馬今夏轉會窗重金引入前車路士球星夏薩特等進攻好手，雖然比利時人呢場因傷缺陣，不過另一新兵盧卡祖域級數都有番咁上下，配合當家前鋒賓施馬，皇馬前場火力依然有保證。可惜佢哋今夏熱身賽防線曳爆，近7仗法定時間僅取2勝2和3負，更狂失18球，包括早前以3比7不敵同城死敵馬德里體育會，施丹真係要諗諗計。
切爾達上季喺神奇隊長伊亞高艾斯巴斯帶領下頻頻搶分，最終成功避過降班厄運，球隊上季頭號射手艾斯巴斯累積20個聯賽入球，亦令其成為上季西甲入球數最多嘅西班牙本土前鋒，有佢喺前線擔大旗，配合新加盟嘅前巴塞隆拿猛將丹尼斯蘇亞雷斯喺中場派牌，切爾達整體戰力相當可觀。況且，皇馬近6次作客切爾達全開4球或以上，今場大盤值得留意。
