今晚英超頭場阿仙奴主場對般尼，「兵工廠」首周作客紐卡素，憑奧巴美揚靈光一閃奠定勝局，最令球迷開心係佢哋保住不失，證明防線比以前更穩定，今晚迎戰「私房菜」般尼，再下一城甚至大捷難度不大。（Now 621周六晚7時30分直播）
至於重頭戰曼城主場對熱刺，「藍月亮」首輪狂派韋斯咸5蛋，鋒芒畢露，而且上屆歐聯8強畀熱刺淘汰，正係對手兩度因VAR判決而獲益，今晚點都要報仇。講開VAR，今季英超全面使用呢項科技，縱使偶爾令比賽有所停頓，但確能做到公平公正、減少誤判。
利物浦踢得密傷唔起
點解我今日唔推介利物浦，一來佢哋因上季要出戰歐聯決賽，比其他球隊遲兩周收咧，二來今夏又有多名主力要踢「太公波」，加上周中歐超盃惡鬥完車路士，耗力不小。我上周講過今季睇好利物浦，但查實佢哋最大對手係自己，其中門神艾利臣比加已經因傷要抖，中堅華基爾雲迪積克、「埃及文明」鋒線亦都「傷唔起」，主帥高普點樣輪換減低傷患嘅影響，將成爭標關鍵。
