周六凌晨西甲開鑼，打頭陣有畢爾包主場挑戰衛冕嘅巴塞隆拿。基沙文同法蘭基迪莊等巴塞重量級強援經歷多場季前熱身賽磨合後，已經逐漸融入球隊，配合射手蘇亞雷斯領銜鋒線，巴塞實力將更上一層樓，今仗勢將打響頭炮，客勝唔好錯過。

（Now 632及611周六凌晨3時直播）

巴塞新賽季多位強援各有來頭，其中基沙文同法蘭基迪莊絕對係最矚目焦點人物，前者作為法國世盃奪冠功臣，以及過往幾季馬德里體育會嘅領軍人物，早已經係西甲賽場嘅頂級球星之一，而後者作為近期急速冒起嘅荷蘭新星，上季帶領阿積士成功勇闖歐聯4強，表現有目共睹，法蘭基迪莊由細深受同巴塞踢法一脈相承嘅阿積士足球理念薰陶，同班新隊友磨合根本唔成問題，由季前熱身賽表現所見，他已多次證明自由有力喺巴塞中場佔有一席之地。今仗即使缺少有傷上陣成疑嘅美斯，有一班强力新兵搭住射手蘇亞雷斯，巴塞前場火力依然足以摧毀任何防線。

畢爾包實力差過上季
上季取得聯賽第8嘅畢爾包未能取得歐戰資格實屬可惜，今季捲土重來肯定希望更進一步。不過季前「巴斯克雄獅」除咗清洗馬高蘇沙亞達同伊度拉斯比等陣中多名過氣老將之外，幾乎冇引入新援，只係保留伊拿基威廉斯等上季骨幹成員，難免令人懷疑球隊嘅取勝決心。況且巴塞近10季聯賽首戰贏晒，其中9次贏對手2球或以上，今仗球隊有望再以一場大勝，為聯賽衞冕征途拉開完美序幕，一於捧客勝。