第57屆德甲今晚開鑼，班霸拜仁慕尼黑主場迎戰哈化柏林，拜仁增兵不力，剛借入嘅翼鋒比列錫要停賽，遇上近季對賽完全唔赦佢哋嘅哈化柏林，讓到兩球、兩球半太過份。哈化暑期簽入「拜仁殺手」盧克巴基奧，今晚排3箭頭陣式存心同拜仁駁火，投注首選中位數3.5球大盤。
（Now 670、FOX+、有線651及611台周六凌晨2時30分直播）
哈化柏林季前針對已老化嘅鋒線增兵，以破隊史紀錄嘅2,000萬歐元買入屈福特年輕鋒將盧克巴基奧，呢位比利時射手上季以外借身份效力杜塞爾多夫爆紅，兩循環聯賽對拜仁共轟入4球，其中去年11月作客安聯球場連中三元更成為佳話，今晚佢以哈化球員身份再訪福地，隨時又做「拜仁殺手」，何況佢哋前線兩位老箭頭伊比斯域同沙洛文卡勞喺德國盃都顯示狀態大勇，今晚好有機會喺安聯球場入波。
哈化今季提升原二隊教練高域執教，佢同球會經理派列斯都係克羅地亞人，同聲同氣夾計今晚做拜仁世界，事實上哈化近5次對拜仁1勝3和1負不落下風，派列斯話佢哋打拜仁主要秘訣係唔退縮，就算作客安聯球場都要搶攻，咁壓力就會喺晒拜仁度，今晚佢哋抱住期待多於緊張嘅心態作客，隨時又有驚喜！
拜仁借將比列錫停賽
拜仁新援比列錫因為上季喺意甲累積5面黃牌，被罰嘅一場停賽要帶埋嚟德甲，今晚無緣上陣，只能地莊出師，雖然射手羅拔利雲度夫斯基已上力，主場出擊入波有保證，但喺季前比賽同德國盃所見，佢哋防線甩漏極多，面對丁組嘅科特布斯都要失波，今晚遇上心存大欲嘅哈化柏林預計會係入球騷，拜仁贏大比數可能性甚低，黑柴撐大盤同哈化柏林下盤。
