開季上足子彈
今晚歐霸外圍賽第3圈上演次回合，其中蘇超格拉斯哥流浪主場再鬥米迪蘭特。「格流」首回合作客都贏4比2，近兩仗狂轟10球火力全開；丹麥代表米迪蘭特豆腐渣防線無力招架，焗住進攻隨時輸多幾粒，一於吼實入球大。
（周五凌晨2時45分開賽）
迪科爾摩尼路斯弗到震
由利物浦「神奇隊長」謝拉特執教嘅格拉斯哥流浪，開季大打進攻足球，繼首回合作客大炒米迪蘭特4比2後，返到聯賽再靠老將迪科爾大演帽子戲法，6比1橫掃喜伯年。不過最搶風頭嘅依然係射手摩尼路斯，呢位哥倫比亞「麻煩友」上季5次領紅牌被逐，喺「蘇格蘭打吡」批襲擊些路迪隊長史葛布朗嘅熱血一幕球迷瀝瀝在目，不過主帥謝拉特堅決唔「割席」，皆因呢位上季蘇超頭號射手近兩場猛轟3粒，延續極順腳風，有佢在陣流浪唔驚冇波入。
上季丹超「2哥」米迪蘭特雖然喺國內聯賽超班，不過近年出戰歐霸就陪跑居多，首回合主場出擊，面對流浪一班弗爆射手都顯得一籌莫展，拎到兩個入波已有交代，加上近6次歐霸作客有5次開4球或以上，兩隊有望再演入球騷，大盤值博。
