周四早上有多場美職上演，阿King度咗條過關心水，重心洛杉磯銀河主場鬥FC達拉斯。銀河強援基斯甸柏禾發揮對辦，今場有佢搭住頭號前鋒伊巴謙莫域，銀河絕對有足夠本錢搶分，主勝值博。

（MyTV Gold 301台、Now 638、有線614及654台周四早上10時30分直播）

銀河連續3場作客失分，包括上仗1比2不敵華盛頓聯隊，不過銀河球迷唔使咁灰，皆因新加盟嘅阿根廷攻擊手基斯甸柏禾，上仗首次上陣表現搶鏡，成功加強球隊側擊能力。呢位曾代表阿根廷出戰世盃決賽周嘅前小保加翼鋒，在銀河處子騷踢到滿場飛，似乎已經同班新隊友有晒默契，呢次返到主場喺老大哥兼球隊頭號射手伊巴謙莫域帶領下，銀河火力絕對唔嘢小。況且FC達拉斯近4仗作客僅取1勝3負，兼且入得2球，其中3場食白果，反擊能力咁曳，都好難同銀河搶分，捧主勝啱數。

伐木者夠贏火燄
另外明尼蘇達聯主場對科羅拉多急流，位處西岸下游分子嘅急流，近排大打進攻足球連場成功搶分，加上球隊近3仗作客全開4球或以上，今場料會照辦煮碗再同對手鬥攻，中位數3.5球入球大值得留意。最後有波特蘭伐木者主場對芝加哥火燄，伐木者喺自己地頭搶分絕不手軟，近7仗主場5勝2和，包括上場3比1擊敗溫哥華白帽，對住作客飄忽嘅火燄，伐木者要贏話咁易，主勝好路。