踢波勁唔勁同教波好唔好真係冇關係，好似曼聯「92班」嘅名宿咁，暫時喺球壇都唔多掂。近有傑斯呢個曼聯助教形同虛設，遠有尼維利兄弟靠關係喺華倫西亞上位。
喺費格遜退休後，莫耶斯接任做領隊，傑斯就做球員兼助教，負責幫莫耶斯處理更衣室嘅關係；之後到雲高爾接手，傑斯仍然留任助教，就係想佢做教練團同球員嘅橋樑。不過，喺呢兩三季嘅後費格遜時代，就成日傳出曼聯更衣室兵變嘅消息，先係里奧費迪南、尹佩斯唔妥莫耶斯，後有朗尼同卡域克唔鍾意雲高爾嗰套。表面上，隻鑊係莫耶斯同雲高爾，但小弟覺得傑斯亦有失職，協調唔好球員同教練團嘅關係。
雖然盛傳傑斯獲得曼聯高層欽點，係下任曼聯領隊嘅人選；但講真，呢個「Chosen one」其實仲衰過莫耶斯，一嚟，傑斯冇乜執教經驗，係前季莫耶斯被炒後頂硬上過幾場；二嚟，傑斯跟過莫耶斯同雲高爾兩個阿頭，暫時兩次都係搞到一鑊泡，又點可以服眾呢？三嚟，傑斯嘅威望都只係限於英倫三島，好難幫曼聯吸引歐陸同美洲球員加盟，喺𠵱家英格蘭人才缺乏嘅時代，吸納唔到歐陸人才就等於死硬。
除咗傑斯，皇家馬德里都有個「Chosen one」叫施丹，係人都知主席佩雷斯一圓夢想叫施丹教皇馬，但施丹夠唔夠料教皇馬，相信大家都心照；唔通求其喺二隊提升個光頭佬上嚟就係哥迪奧拿咩！