「荷蘭叻」近期頻頻發功上節目，但就真係自暴其短，冇學識唔緊要，唔好連做人基本分析、邏輯都冇，講嘢東一忽西一忽又搬龍門。荷蘭叻所謂成功上位，其實就係把握華人社會嘅劣根性，無錯，就係寵信擦鞋仔。小道消息荷蘭叻一生人冇瓣叻，最叻就係擦鞋，八十年代就「碼」到鐘錶兄弟「撈」到油水，但唔生性炒燶期指又老破，𠵱家就「碼」到電視台新老闆，以為靠口才幫老闆擋風擋雨，但結果換來更多責罵。
華倫西亞班主林榮福雖然係新加坡人，但畢竟有華人血統，迷信擦鞋仔呢個習慣都好難避免。講真以一個亞洲有錢佬想去歐洲搞波，好似昆士柏流浪、卡迪夫城老闆都交唔少學費，錢就使好多，結果隊波就越踢越差。林榮福以為拍住七小福有好結果，雖然呢班球員過去踢曼聯搵唔少錢，過去投資亦都執唔少，但就唔代表真係想幫林生手。
華倫西亞炒教練原本都冇乜嘢，最驚訝就係搵加利佬（圖）接任，加利佬踢波時都算普普通通啦，拍住碧咸同傑斯，冇乜犯錯，就算冇速度跑得慢唔夠快，都一樣有正選囉。退休後英格蘭冇球隊搵佢做教練領隊，就證明料子有限，靠把口做吓講波佬，如果講波叻就真係帶波叻，荷蘭叻都可以去帶荷蘭國家隊啦；好彩加利佬都有啲自知之明，繼續用細佬菲臘佬做助手，菲臘佬就算係有骨氣嘞，球會時期已經出走曼聯，去愛華頓跟莫天才學嘢。季初小弟都睇好華倫有機會爭吓西甲前四，不過𠵱家俾佢兩兄弟咁搞，就真係唔多睇好。